陌生

我諗呢篇野我應該都係用粵語黎打吧
因爲我唔想某人睇得太明
唔睇就最好 =D
(看不懂廣東話的請跳到最後一段)

anyway
大概一個禮拜前
有個算得上係朋友既人黎呢度玩
幾日後 佢飛走既時候
除咗 "甩難了" 我腦裏面咩都諗唔出
點解?
明顯地同呢幾日有關喇~

首先講下呢位算得上係朋友既人先
佢大過我七年有多 係異性 (大佬們... 唔好諗太多)
平時當佢係傢姐咁
至於點認識 其實係打機時認識既 (我有N個網友 - 正常果只)
不過其實之前佢已經話想黎
話咗兩年有多架了
不過我成日搵唔知咩理由黎推佢
通常都話要讀書吧
而且我返新加坡時我都唔會搵佢
其實講真 呢次之前佢畀我既印象已經好差
成日嫌呢嫌嚕 又成日話全世界都針對佢
仲成日埋怨呢樣果樣
大佬... 関我屁事吖?
不過算喇
既然依傢放假 你話想黎 咪陪你幾日囖
反正冇下次

好喇
條友黎喇
第一日 佢話佢點半機
我大概點九到到機場
等到兩點半 放棄
去咗食飯
邊食飯邊隔兩至三分鐘打一次畀佢
然後三點 我開始燥低 (過幾日先發覺我燥低得太快了 因爲仲有大把機會)
再等... 冇意義喇
我搭車閃人
好喇 到到三點三 坐緊車
條友終于打黎
話佢打緊的去酒店
話搵我唔到
咁我問佢點解唔打黎
佢話霎時間唔記得我既電話儲存咗係邊
... 好野 你贏 ... ...
到到迪士尼 已經係唔點半了
好彩迪士尼冇咩行
冇所謂喇 可能之前溝通得唔好
不過呢個只係第一日...
後面既仲精彩...

好喇 到到第二日
本來約好咗九點係地鐵站等
因爲佢話八點起到身
我九點兩個字到到約好咗既地鐵站 (唔係常去 所以我唔熟 遲咗)
一開始我都戇戇地咁以爲自己遲咗 會唔好意思
不過去到唔見人
等...
到到大概十點兩個字
條友打黎話啱啱起身
話自己電話冇電 唔記得叉電
冇野講 ...
係度白等咗成粒鐘 而且仲係地鐵站
條友又冇用得既手機 所以我又行唔得開
唔可以去商場行下或餐廳坐下 (當時未食早餐... 而且天氣鬼死咁凍)
只好好似個電燈柱咁企係度
好喇... 既然條友話出緊黎 咁唯一可以做既係...
...再等...
到到大概十一點九個字
條友終于出現...
話唔見咗房鎖匙...
算 我唔同你計較
至於剩餘既時間 大致上都算得上係和平
除咗條友成日投訴話唔鐘意逼之外
都冇乜大事發生
不過好戲在第三日

呢次我冇咁蠢 再約時間了
我叫佢出門時打黎一次 到地鐵站時再打黎一次
九點八打黎 我十點出門 佢十點二再打黎 我十點四到
要佢等十分八分 縂好過我等成粒鐘
好喇 換酒店 去廟拜拜
到到新既酒店 放低行李 搞下呢搞下嚕 兩點半出發
第一站 女人街
去到女人街 行咗大概半個鐘 我同佢講話轉頭再返黎買野
費事攞住一抽二掕周圍走
本來諗住同佢行埋廟街同柏麗大道
不過一出到去就問我 我係唔係搵緊地鐵站
咁我就話我諗住行去 順路可以睇多啲野
佢就話 搭車去第二個景點 唔好曬佢時間...
...我已經浪費咗幾多時間係 "等" 上面了... ...
算 唔同你計...
搭地鐵 條友開始畀面色我睇 ...
到到尖沙嘴站 我就開始番我"導遊"既呢份工作
一出崇光 (去海旁嘛~)
第一個見到既係太空舘
我就開始介紹 然後問條友去唔去
佢便回答 你帶我黎呢度就係爲咗呢個?!
... -.- ...
然後再過多幾步 到到海旁
好喇 再做番我既 "導遊" 工作
佢今次就話 "你咁早帶我黎做咩吖 都未天黑 我寧可去買野"
... -.- ...
... 帶你周圍走 係你叫既 ... 咁勁就自己一人行喇 -.-
好喇 我都開始起火 既然佢以爲我趕鴨仔搵佢苯 咁我就黎真蹬佢波鐘囖
我就同佢講 我依傢帶你黎 係想你日抖同夜晚既景都睇到 因爲等陣我地會坐渡輪來回睇景
佢信...
然後再帶佢去星光大道 再蹬多啲波鐘 (反正唔使入場費)
好喇 佢心情好返啲 我都易做啲

跟著天黑了 去食飯
佢話肚痛...
大佬... 肚痛咪屙屎囖
同佢講話去九龍公園
佢話唔鐘意公園廁所
唔緊要...
然後就要去隔離警署既廁所...
... 大佬 玩野吖? ...
咁我就緊係喪叫佢去公園既廁所喇
ok 終于畀我説服佢去公園既廁所
又再等多半個鐘
出黎 諗住好地地去食碗雲吞面
一去到 我就問佢要唔要試下魚蛋
佢一口就話佢唔食魚蛋
點解? 因爲如果魚蛋臭 佢會成碗唔食
大佬... 呢度係香港吖...
好喇 叫咗野喇
條友又開始埋怨
話食錯野之類
我好心問佢 好返啲未 佢一句就剷過黎 邊有人屙一次就好架
...
我就話 我係咁
佢就再剷多一句 個個人體質唔同
好囖 我唔出聲囖 多講多錯 少講少錯 唔講唔錯
食完 睇黎條友好似覺得雲吞面唔錯
因爲心情好番 (我未)
佢就開始睇髮夾
五蚊一只果種
睇咗成粒鐘
算 你唔好發脾氣就好了
好喇 再去返女人街
行咗幾行 買咗少少野
然後就話對呢度好失望
因爲買唔到平過新加坡既野
大佬... 如果新加坡有而香港又有 你買黎做乜呢...
特登係香港買...
算 我唔同你計
好喇 返酒店喇
約第四日點
呢度就真係頂唔順了
問佢幾點 佢就話應該係我決定至啱
... 第二日你好似遲到遲咗三個鐘喔...
然後佢就又開始埋怨話 一日都係我搞到佢買唔到老婆餅
.... -.- ....
ok 咁就九點囖
我就講話我可能會遲到 因爲酒店比較偏僻 (大角嘴)
佢就大聲話 唔緊要 佢九點就會咗係度等我
如果早知佢咁講 我就同佢賭一分鐘一百蚊...

好喇 閃人
但條友話明要老婆餅
無所謂 你黎香港 我係有責任招呼你
但係十二點 要去邊度搵老婆餅吖 大佬...
好彩我住佐敦 因爲廟街附近有間餅屋未關
雖然得兩個老婆餅 不過算喇
好過冇
然後到到最後一日
好喇 條友應該訓夠喇
因爲如果賭一百蚊一分鐘 我應該可以賺到三千蚊
條友果日心情好明顯靚過前一日好多
因爲佢開始講扮好人 好似尋日冇嬲過咁
咁就一直到到機場
直到佢入閘
直到我同自己大聲講 "甩難了"!

唉
條友都係有問題架喇
因爲我同佢講話香港咩都有翻版
就連廁紙都有翻版
而tempo係正版
條友有病到去買兩條tempo返去做手信...
講真 收到呢份手信 真係唔知笑好定喊好...

講真
你來到香港玩
做朋友的 也只想你玩得開心點
這也就夠了
要我白等五六個小時 我無所謂
要我這幾天花千多塊 我無所謂
要我每天睡三個小時 我無所謂
要當我的話是耳邊風 我無所謂
要我淩晨去找老婆餅 我真的無所謂
可是要是你發我脾氣 我就真的受不了了
回去後 你所道的謝 你所讚的美
我在裏面只看見了你的虛僞和無知
別以爲我稱你一聲姐 你就可以爲所欲爲
抱歉
我們之前只是最普通不過的朋友
而現在呢
我們只是互不認識的陌生人罷了
若你看到
以後別找我 跟我講話 或寄信給我
以後別來香港
以後我去新加坡你也不會懂的
因爲
我們只是互不相識的陌生人罷了